Mizoram police hotute sawi danin, mipui thinrimin kut an thlak TV zuar hnam dang pathum, Bolero dum-a chuang te hian Thawh\anni chhun dar 11:30 hnu lamah Assam a\angin Vairengte paltlangin Mizoram an lut a, naupang rukbo tum hun tlai dar 3 vel-ah West Lungdar thlen hman ngaihna a awm loah ngaih a ni. Hemi piah lamah naupang hian amah rukbo tumtute motor chu a var nia a sawi laiin, vai pathumte chuanna motor hi chu a dum a ni thung a. Hei vang hian heng mite hi chu naupang rukbo tumtu ni thei lova ngaih an ni.
‘Hnamdang pathumin West Lungdar naupang pakhat khawlaia lo awm lai chu a ka hupsakin an motor ah hlangin an tlanpui a, naupang hi a rubotute lak a\ang hian a tlan chhuak’ tih thu hi Thawh\anni khan nasa takin social media ah a darh a, Khuangchera Group YMA huamchhunga khaw hrang hrang YMA te pawhin anmahni khaw ram chinah heng naupang rubotu nia sawite man tum hian an duty nghal a, West Lungdar khua bakah South Sabual leh Khawlek tlangdung te, Darlung lam thlengin an huam chinah duty insiamin khaw engemawzat chu Thawh\an zanah khan tlaivarin an duty a ni.
Hnamdang pathum leh an chuanna bolero dum chu nimin tuk\huan eikham khan khan South Sabual khuain an man a, hemi hnu hian police ten South Sabual hi panin hnamdang pathum te hi an khawtlang hruaitute kut a\angin an la chhawng a. South Sabual a\ang hian Aibawk lam panpui lovin West Lungdar lamah Police te hian an hruai a, West Lungdar khua hi tlai dar 4 velah an thlenpui a, rukbo an tum nia sawi, naupang hian heng mi pathumte hi amah rukbo tumtute nia a sawi hnuah mipui thinrimin motor a\anga pawt chhuakin kut an thlak ta a, an chuanna motor, bollero dum chu West Lungdar khelmualah mipui thinrimin an hal zui a ni.
South Sabual khawtlang hruaitute leh West Lungdar khawtlang hruaituten Zonet zawhna an chhanna a\anga a lan danin, police thawk chhuakte hi mi 20 tling lo an ni a, Aizawl leh West Phaileng a\anga thawk chhuak an ni. Social mediaah inrukbona a thleng nia sawi hi nasa takin darh nghal mahse, Chanchin thar-ah emaw Social Media hmang vek emaw pawha Police te hmalakna puanzar a awm lo a, rin thu leh ngaihdan chi hrang hrang thu lengvak a tam hle a ni.
Hnamdang pathumte hi Aizawl thlenpui an nih hnuah an hriselna dinhmun endik an ni a, hliam na lutuk an tuar lo a, Police hotute’n Zonet zawhna an chhan danin naupang rukbo tum nia sawi pa in FIR a thehluh bawhzuiin Kulikawn Police Station ah inrukbo tumna thubuai ziah luh a ni ang a, naupang rukbo tumtu nia sawite hi chhui zui nghal an ni.
Hetihrual hian Motor hal leh kut inthlak thubuai pawh West Phaileng Police Station ah ziah luh a nih hmel bawk.
Naupang ruk bo tum thu hi nikum October thlaah pawh Koalsib leh Lawngtlai District lamah a lo thang chiam tawh a, Young Lai Association te pawh hmun \henkhatah chuan duty an insiam a. India ram hmun dangah pawh thu thang dik lo vanga in chil hlumna hi a thleng fo tawh a ni.
