ZPM Aizawl East-I Workers Meet, Kalphung Thar Zirna vawiina Sihphir Community Hall-a neihah thusawiin Pu Lalduhoma chuan ZPM dinhmun chu a \ha chho zel nia sawiin rorel lai pawl Congress boruak erawh chu a hniam sawt hle a, Chief Minister Pu Lal Thanhawla pawhin khaw pakhat chu Congress a an inpek chuan chhungkaw tin tan \anpuina tam tak pek a tiam hial tawh niin a sawi a, hetih lai hian MNF party pawh lut tharte avangin an party chhung a buai hle niin a sawi bawk. Pu Lalduhoma chuan Congress leh MNF chu duh thuhmun leh tih tum thuhmun niin a sawi a, Congress-in cheng vbc 2,800 sem turin a dah a, MNF-in cheng vbc 6,000 sem a tum bawk a, Congress leh MNF chu danglamna awm lo niin a sawi a ni.
Aizawl East-I biala ZPM candidate tur Pu K. Sapdang pawhin thusawiin an party thlantlin a nih chuan an bial chhunga a daifem lam a\angin hmasawnna hna thawh \an a ni dawn niin a sawi a, kum 20 chhung zet rorellai pawlin he bial hi enkawl tawh mahsela, hmasawnna hna thawh a tlem hle niin a sawi a, ZPM-in thuneihna a chan chuan kuthnathawktute thlai thar pawh rate \ha taka hralh theihna siamsak an ni dawn a, Sihphir leh a chhehvel khuaa kuthnathawktu taima tak takte chuan rate \ha zawkin an thil thar an hralh thei tawh dawn niin a sawi a ni.
He inkhawma thusawitu dang, Pu Vanneihtluanga pawhin sorkar hnathawk zingah rinawm leh \ha taka hna thawh duh an awm laiin, ram hruaitu \henkhatten a ruka thil tih duh an neih tlat \hin avangin sorkar hnathawkte an ring ngam lo fova, chutiang hruaitute hmaah chuan Mizoram chu a mualpho mek niin a sawi a, an bial viltu tura ZPM-in a ruat chu mi taima, rem hria leh rintlak niin a sawi bawk. ZPM-in Aizawl East I Workers Meet a buatsaih, Kalphung Thar tur inhrilhfiahna ni nghal hi ZPM North Block Chairman Pu Lalnelawma’n a kaihruai a ni.
